6 نصايح هتندم لو طبقتهم

6 نصايح هتندم لو طبقتهم

By / Fotouh M Khalifa

1- "عيش سنك واتمتع بحياتك، انت مش هتعيش غير مرة واحدة." جملة ساذجة هتسمعها من شخص حرفيا محققش أي حاجه في حياته وبيقولها عشان يراضي ضميره ويداري تقصيره لانه فعلا لو حقق حاجه اكيد طلع عينه لحد ما وصلها وساعتها هيكون عارف قيمة الدقيقة اللي هتعدي من غير ما يعمل حاجه.
وانا مش بقولك ادفن نفسك بالحيا، لا. بس بقولك ابني نفسك دلوقتي واستغل كل ثانيه صح لان مع مرور الوقت حماسك ده هيختفي وهتلاقي نفسك في آخر الصف.



2- "للأسف محتاج واسطة عشان تشتغل في المكان ده". جملة تافهه بنكررها زي البغبغانات وبنأيدها بمثالين وبنسيب 100 نموذج تاني اشتغلو في المكان ده بمجهودهم.



3- "خد كورس بشهادة معتمدة عشان ال CV" جملة غبية محفوظة من كام سنة وللأسف أماكن الكورسات بتكررها عشان ينصبو عليك ويقلبوك في قرشين. مفيش HR محترم شغال في شركة محترمة هبقبلك عشان شوية شهادات عبيطة يتعملو ع الفوتوشوب. هتقابله في الانترفيو راجل لراجل وكله هيبان يا شبح. هيبان اللي معاه لغة صح من الاهبل اللي واخد كورس في سنتر معتمد من وزارة التموين الكندية والبيت الابيض وترامب ماضي علي الشهادات



4- "ركز في الكلية والتقدير وخد كورسات بعد ما تتخرج" جملة هبله كانت السبب في ضياع شباب كتيير اتخرجو وملقوش شغل لانهم معنهدمش اي حاجه يدوها للشركات غير شوية كلام عبيط حافظينه في كتب الكلية وفي الآخر كانو مضطرين يقبلو أي شغل أو صنعه بعيده عن مجالهم.


5- "التطوع والأنشطة الطلابية هتضيع وقتك". إنت مش صغير عشان تسمح لحد يضيع وقتك. التطوع من أجمل الحاجات اللي ممكن تعملها وهيضيفلك كتييير جدا وهتتعلم كتير ولو روحت ولقيت اختلاط والتيم مش منظم متكملش معاهم عاادي جدا وشوف تيم افضل.



6- "قدام مجاني يبقا تعبان" جملة متخلفة بيقولها شخص عنده عقدة الخواجة. شخص بيحكم ع المنتج من سعره، لو سعره عالي يبقا كويس إنما لو رخيص يبقا وحش. عاوز اعرف هتخسر ايه لو روحت وجربت وشوفت بنفسك. ولا احنا بنحب اللي يمص دمنا.
بلاش تطبق أي نصيحة تسمعها. انت ليك مخ تميز بيه واتعود تجرب كل حاجه بنفسك والمناسب ليك ولحياتك طبقه بس حط في اعتبارك إنك لازم تدفع ضريبة نجاحك.


- قولنا في كومنت نصيحة غلط سمعتها ممكن حد محتاجها